Bugun JAR sport-sog‘lomlashtirish markazida O‘zbekiston Voleybol Federatsiyasi tarixidagi ilk matbuot anjumani tashkil etildi.

Davlatimiz rahbarining 2024-yil iyul oyida imzolagan “Voleybol sport turlarini yanada rivojlantirish chora-tadbirlari to‘g‘risida”gi qarori asosida mamlakatimizda ushbu sport turini yanada ommalashtirish, iqtidorli sportchilarni saralash tizimini yaxshilash, uning zamonaviy sport infratuzilmasini yaratish, milliy terma jamoalarimizning xalqaro musobaqalarda natijadorlikka erishishini ta’minlash ustuvor vazifalardan biri sanaladi. Mazkur musobaqalar Markaziy Osiyo Voleybol Assotsiatsiyasi (CAVA) shafeligida O‘zbekistonda o‘tkazilayotgani bilan alohida ahamiyatga ega. 

Tadbir davomida quyidagi uch asosiy masala muhokama qilindi:

1. "Ichki ishlar vaziri kubogi" musobaqasi – 2025-yil 6-iyun kuni bo‘lib o‘tadigan, Probatsiya nazorati ostidagi yoshlar o‘rtasida ilk bor tashkil etilayotgan turnirning final bahslari haqida ma’lumot berildi.

2. "Millatlar ligasi" musobaqasi – 29-maydan 4-iyungacha Farg‘ona shahrida o‘tkazilishi rejalashtirilayotgan xalqaro turnirga tayyorgarlik jarayonlari ko‘rib chiqildi.

3. CAVA U-16 va U-19 yoshlari o‘rtasidagi musobaqalar -10-16-iyun kunlari Toshkent shahrida bo‘lib o‘tadigan turnirlar yuzasidan rejalar muhokama qilindi.

Shuningdek, federatsiyaning 2024–2025-yillar mobaynida erishgan yutuqlari, o‘tkazilgan musobaqalar va sportchilar faoliyatiga oid tahliliy ma’lumotlar taqdim etildi. OAV vakillarining savollariga federatsiya mutasaddilari atroflicha javob qaytardilar.

Eslatib o'tamiz, mazkur musobaqalar Markaziy Osiyo Voleybol Assotsiatsiyasi (CAVA) shafeligida O‘zbekistonda o‘tkazilayotgani bilan alohida ahamiyatga ega. 

Tadbirda Federatsiya rais o‘rinbosari Jamshid Fayziyev so‘zga chiqib, yangi ishga tushirilgan JSPORTTV onlayn platformasi haqida ma’lumot berdi. Unga ko‘ra, endilikda voleybol uchrashuvlarini dunyoning turli davlatlaridan to‘g‘ridan-to‘g‘ri tomosha qilish imkoniyati yaratilmoqda. Platformadagi ilk translyatsiyalar Farg‘onada o‘tkaziladigan “Millatlar ligasi” doirasida amalga oshiriladi.

                                                      O'zbekiston voleybol federatsiyasi Axborot xizmati