FIVB delegatlari Mushtaque Mohammed va Yordan Zhechev ishtirokida navbatdagi ishchi yig‘ilish bo‘lib o‘tdi. Unda mehmonlarni kutib olish marosimlari, musobaqaga oid texnik va tashkiliy jihatlar atroflicha muhokama qilindi. Delegatlar musobaqa o‘tkaziladigan zallarga tashrif buyurib, yakuniy tayyorgarlik jarayonlarini ko‘zdan kechirishdi.

Yig‘ilish davomida FIVB vakillari tashkilotchilik darajasidan mamnun ekanliklarini ta’kidlashdi va quyidagi fikrlarni bildirishdi:

"Federatsiya biz bildirgan ishonchni to‘liq oqladi. Qisqa vaqt ichida bunday yirik turnirga tayyor bo‘lishingizni kutmagandik. Biroq siz bu vazifani nafaqat uddaladingiz, balki biz kutgan natijadan ham yuqori darajada tashkillashtiribsiz. Bu bizni quvontiradi. Endi Chempionat yuqori saviyada o‘tishiga hech qanday shubha qolmadi".

Shuningdek, delegatsiya a’zolari o‘z tashriflarining asosiy maqsadi nazorat emas, balki do‘stona yordam ko‘rsatish ekanini ta’kidlashdi:

"Biz bu yerga sizlarni tekshirish uchun emas, balki yordam berish uchun keldik. Biz — besh qit'adan kelgan mutaxassislar jamoasimiz. Har qanday vaziyatda bemalol murojaat qilishingiz mumkin. Bu musobaqani birgalikda eng yuqori saviyada o‘tkazamiz" — degan iliq va do‘stona so‘zlar bilan yakunlashdi FIVB vakillari.

                                                        O‘zbekiston Voleybol federatsiyasi matbuot xizmati