CAVA Xalqaro voleybol musobaqasining tantanali ochilish marosimi bo‘lib o‘tdi

2025-yil 10–16-iyun kunlari Toshkentdagi “Jar” sport majmuasida U-16 va U-19 yosh toifalari o‘rtasida voleybol bo‘yicha xalqaro musobaqasi start oldi. Bu musobaqa ketma-ket uchinchi bor tashkil etilmoqda va bu yilgi bahslar nihoyatda yuqori saviyada o‘tishi kutilmoqda.

Musobaqaning ochilish marosimi 10-iyun kuni bo‘lib o‘tdi. Unda O‘zbekiston Respublikasi sport vaziri Ikramov Adham Ilhamovich, Voleybol federatsiyasi raisining birinchi o‘rinbosari Abdullayev Bekmurod Tojimirzayevich, tegishli tashkilotlar rahbarlari, xalqaro delegatsiyalar va ommaviy axborot vositalari vakillari ishtirok etdilar.

Marosim davomida so‘zga chiqqan rasmiylar voleybol sportining so‘nggi yillarda O‘zbekistonda ham, butun mintaqada ham jadal suratda rivojlanayotgani, xalqaro musobaqalarning esa yosh avlod sportchilari uchun muhim maydon bo‘layotganini alohida ta’kidlashdi.

Ishtirokchi jamoalar tantanali tarzda bayroqlar ostida yurib o‘tdilar. Bu musobaqa yosh sportchilar uchun nafaqat raqobat, balki madaniy almashinuv va xalqaro do‘stlikni mustahkamlash maydoniga aylanadi.

Tadbir doirasida bayramona konsert dasturi ham namoyish etildi. Unda O‘zbekistonning mashhur san’atkorlari, folklor raqs jamoalari va yosh ijrochilar ishtirok etib, tomoshabinlarga ko‘tarinki kayfiyat ulashdi.

Ma’lumot uchun musobaqada Eron, Hindiston, Qozog‘iston, Qirg‘iziston, O‘zbekiston davlatlarning terma jamoalari ishtirok etmoqda.

                                                                                          O'zbekiston voleybol federatsiyasi Axborot xizmati