Voleybol boʻyicha yigitlar oʻrtasida U19 yosh toifasida o'tkaziladigan jahon chempionatiga tayyorgarlik ko‘rish bo‘yicha Tashkiliy qo‘mita yig‘ilishi o‘tkazildi

Bugun Sport vaziri Adkham Ikramov rahbarligida tegishli vazirlik va idoralar hamda federatsiyasining mas’ul xodimlari ishtirokida yigitlar oʻrtasida U19 yosh toifasida o'tkaziladigan jahon chempionatiga tayyorgarlik ko‘rish bo‘yicha Tashkiliy qo‘mita yig‘ilishi o‘tkazildi.

Ma'lumki, joriy yilning 24-iyul – 3-avgust kunlari poytaxtimiz voleybol boʻyicha yigitlar oʻrtasida U19 yosh toifasidagi jahon chempionatiga mezbonlik qiladi. Mamlakatimizda ushbu sport turida ilk bor tashkil etiladigan mazkur musobaqada dunyoning eng kuchli 24 jamoasi gʻoliblik uchun bellashadi.

Adkham Ikramov yig‘ilishda shunday dedi:

“Voleybol boʻyicha yigitlar oʻrtasida U19 yosh toifasida o'tkaziladigan jahon chempionatini yurtimizda eng yuqori darajada tashkil etish — nafaqat sport, balki mamlakatimiz obro‘si uchun ham muhim voqea. Bu borada barcha mas’ul idoralar o‘z ishini puxta va hamkorlikda olib borishi zarur.”

Yig'ilishda U19 yosh toifasidagi jahon chempionatini yuqori darajada o‘tkazish maqsadida amalga oshiriladigan ishlar xususan, bu borada tegishli vazirlik va idoralarning o‘zaro hamkorlikdagi faoliyati muhokama qilindi.

Mas'ullarga xalqaro musobaqa ishtirokchilari joylashadigan, ovqatlanadigan, tashrif buyuradigan joylar va ularning atrof-hududlarida jamoat tartibini saqlanishi, yong‘in va fuqarolar xavfsizligini ta’minlash, shuningdek, xorijiy davlatlardan keladigan ishtirokchilarga kirish vizalarini tezkorlik bilan rasmiylashtirilish masalalari bo'yicha tegishli tavsiya va ko'rsatmalar berildi.

                                             O‘zbekiston Voleybol federatsiyasi matbuot xizmati