Bugun, O‘zbekiston Voleybol Federatsiyasida kengaytirilgan yig‘ilish bo‘lib o‘tdi. Yig‘ilishda Farg‘ona shahrida 29-may sanasidan 4-iyun kunlari o‘tkazilishi rejalashtirilgan Millatlar Ligasi hamda 8-16- iyun kunlari poytaxtimizda o’tkazilishi rejalashtirilgan Markaziy Osiyo bo‘yicha U16 va U19 yosh toifalaridagi CAVA musobaqalariga tayyorgarlik ishlari muhokama qilindi.

Yig‘ilish davomida musobaqalarni yuqori saviyada tashkil etish uchun amalga oshirilayotgan chora-tadbirlar haqida axborotlar tinglandi. Federatsiya raisi o‘rinbosari Jamshid Fayziyev tomonidan xodimlarga aniq ko‘rsatmalar berildi. Shuningdek, sportchilarning jismoniy va texnik tayyorgarligi bo‘yicha muhim tavsiyalar berildi. Yig‘ilishda mavjud muammolar tahlil qilinib, ularni bartaraf etish bo‘yicha kelishuvlarga erishildi.

Musobaqalar haqida:

• CAVA U16 va U19 musobaqalari: Markaziy Osiyo Voleybol Assotsiatsiyasi (CAVA) tomonidan tashkil etiladigan U16 va U19 musobaqalari 2025-yilning iyun oyida O‘zbekistonda o‘tkazilishi rejalashtirilgan.

• Millatlar Ligasi: Dastlab Pokistonda o‘tkazilishi rejalashtirilgan CAVA erkaklar Millatlar Ligasi musobaqasi, mintaqadagi siyosiy vaziyat sababli, O‘zbekistonga ko‘chirildi. Ushbu yig‘ilish O‘zbekistonda voleybol sportini rivojlantirish va xalqaro musobaqalarni muvaffaqiyatli o‘tkazishga qaratilgan muhim qadam bo‘ldi.