Ozarbayjonlik voleybolchi qizlar Toshkent bo‘ylab sayohat qildi

Mamlakatimizda o‘quv-mashg‘ulotlarda ishtirok etayotgan Ozarbayjonning 16 yoshgacha bo‘lgan qizlar terma jamoasi uchun Toshkent shahriga sayohat tashkil etildi.

Dastlab, sportchilar O‘zbekiston Respublikasi Ichki ishlar vazirligi muzeyiga tashrif buyurib, mamlakatimiz huquq-tartibot tizimi tarixi va faoliyati haqida qimmatli ma’lumotlarga ega bo‘ldilar. Shundan so‘ng, ular Olimpiya va Paralimpiya shon-shuhrati muzeyida bo‘lib, sportning yurtimizdagi rivojlanish tarixi va bugungi yutuqlari bilan yaqindan tanishdilar.

Sayohat davomida mehmonlar uchun milliy taom — osh bilan tantanali tushlik uyushtirildi. Keyingi qismda esa qizlar Tashkent City Mall hamda Magic City majmualarida bo‘lib, shahar manzaralari va dam olish maskanlaridan bahramand bo‘ldilar.

Kun yakunida Ozarbayjonlik sportchilar o‘zbek xalqining mehmondo‘stligi, san’ati, madaniyati va shahrimiz go‘zalligidan chuqur taassurot olganliklarini bildirdilar.

                                                                                           O‘zbekiston Voleybol federatsiyasi matbuot xizmati