Joriy yilning 3–9-sentabr kunlari Qirgʻizistonning Choʻlpon-Ota shahrida III Turkiy davlatlar Universiadasi boʻlib oʻtadi.

Ushbu nufuzli musobaqada 5 ta mamlakat sport jamoalari ishtirok etadi. Oʻzbekistondan esa 80 nafar talaba-sportchi qatnashib, sportning 5 ta olimpiya va 2 ta noolimpiya turi boʻyicha gʻoliblik uchun bahsga kirishadi.

Oʻzbekiston Voleybol Federatsiyasi nomidan ham yosh voleybolchilarimiz Universiadaning ishtirokchilari safida Vatanimiz sharafini himoya qilish uchun safarga yoʻl oldilar.

Universiada oʻyinlari yosh sportchilarimizning mahoratini namoyish etish, xalqaro tajriba orttirish va turkiy xalqlar oʻrtasida doʻstlik rishtalarini yanada mustahkamlashga xizmat qiladi.

Sportchilarimizga omad, kuch-g‘ayrat va yurtimiz sharafini munosib himoya qilishlarini tilaymiz!

                                                                           O‘zbekiston Voleybol federatsiyasi matbuot xizmati