Xabar berganimizdek, bugun Toshkent shahrida O‘zbekiston korporativ sport assosatsiyasining faoliyatini yo‘lga qo‘yish va korporativ sportni rivojlantirishga bag‘ishlangan tadbir bo‘lib o‘tdi. Unda davlat va xususiy sektor vakillari, sport tashkilotlari rahbarlari hamda 170 mingga yaqin xodimlar band qilingan 200 dan ortiq tadbirkorlar ishtirok etdi.

  O‘zbekiston Respublikasi Prezidentining 2024-yil 4-dekabrdagi PQ–421-son qaroriga muvofiq, tadbirkorlik subyektlari o‘rtasida sport va jismoniy faollikni targ‘ib qilish maqsadida O‘zbekiston korporativ sport assotsiatsiyasi tashkil etildi va uning raisi etib Savdo-sanoat palatasi raisi D.Vaxabov saylandi, ijrochi direktor etib Sh.Sattorov tayinlandi.

Uchrashuvda korporativ sportni rivojlantirish va ommalashtirish, xususan Assotsiatsiya tomonidan tadbirkorlar o‘rtasida sport musobaqalarini tizimli ravishda tashkil qilib borilishi hamda Sport vazirligi va Milliy olimpiya qo‘mitasi tomonidan sport infratuzilmasi va tashkiliy-uslubiy jihatdan ko‘maklashib borilishi bildirib o‘tildi.

 ⏺Shuningdek, uchrashuv davomida "AKFA GROUP" asoschisi Jahongir Ortiqxo‘jayev Assotsiatsiya raisining birinchi o‘rinbosari sifatida, "International Beverages Tashkent" MCHJ XK direktorlar kengashi raisi Shuhrat Ergashevni rais o‘rinbosari sifatida saylash taklifi bildirildi va bir ovozdan qo‘llab-quvvatlandi.

 Turli sport turlari bo‘yicha Assotsiatsiya Boshqaruv kengashi a’zolari sifatida quyidagi yirik tadbirkorlar belgilandi: 

Behzod Mamatqulov ("BMB Holding") — futbol va futzal;

Zafar Hoshimov ("Korzinka") — basketbol;

Bahodir Abdullayev ("B.A.Holding") — stol tennisi;

Murod Nazarov ("Murad Buildings") — yengil atletika.

⏺Tadbir yakunida ishtirokchilar tomonidan korporativ sportni rivojlantirish hamda tadbirkorlar orasida sport musobaqalarini tizimli ravishda o‘tkazib borishga kelishib olindi.